Presidenti amerikan Donald Trump tha të hënën se nuk mendon se Ukraina mund të fitojë luftën kundër Rusisë, por shtoi se “gjithçka është e mundur”.

“Ata ende mund të fitojnë,” tha Trump në Shtëpinë e Bardhë, duke shtuar: “Nuk mendoj se do të fitojnë. Lufta është një gjë shumë e çuditshme”, tha ai.

Të premten, Trump u takua me presidentin ukrainas Volodymyr Zelenskyy në Uashington, ku kërkoi që Kievi dhe Moska të ndalonin frontin aktual të luftës. Zelenskyy e përshkroi takimin si “pozitiv”, edhe pse nuk mori raketat Tomahawk për ushtrinë e tij.

Zelenskyy tha se Trump nuk pranoi dërgimin e raketave me rreze të gjatë pas një bisede telefonike me presidentin rus Vladimir Putin disa orë më parë. Ai shtoi se Ukraina po planifikon të blejë 25 sisteme mbrojtjeje ajrore Patriot, por sigurimi i tyre kërkon kohë për shkak të pritjeve të prodhimit.

Presidenti ukrainas tha se Trump mbështeti një ngrirje të frontit aktual dhe shpreson që takimi i tij i ardhshëm me Putinin në Hungari të hapë rrugën për një marrëveshje paqeje.

Ndërkohë, sekretari amerikan i shtetit dhe ministri i jashtëm rus biseduan me telefon për hapat e ardhshëm drejt përfundimit të luftës. Të dy ministritë thanë se biseda ndërtoi mbi kuptimet e arritura nga Trump dhe Putin më 16 tetor, raporton Euronews.

Trump po planifikon të takohet së shpejti me Putinin, ndërsa senatori Marco Rubio do të takohet me një delegacion të lartë rus, me gjasë të udhëhequr nga Sergey Lavrov./rtk